Revelation of John 8
1Esa n kugya ɓei lo hatimi tnabai ya, aku ce pi fi n eshe mi ngye minti shita. 2Ma gye amalaika tnaba nɓa zhi Shekwoyi abye nyi, a ga ɓa a mwayi ngun tnaba.3Nnavun malaika nwo n Zinariya shapai shinyi wa ɓe wa gni n bagadi I aba a gawo a tulare ge wa gmi kwo aje n Shekwoyi aza aduwa yi, wa ze kpe n bagadi zinariya nya n esushinkpegye abye. 4Tulare yiho ashin kwo ɓedo n Shekwoyi aza wyegyi yi nyi, kwa gunlo Shekwoyi aba daga bagadi aba n malaika ɓei zekwoya kpe. 5Nna vun malaika wa ce ena n bagadi wa fi kwo n shanpa wa zekwoya kpe n anyi ogma bmiya, anyi ɓa shan-shan.
6Nnavun, amalaika ngun tnaba n ɓa n na a mwayi tnabai shinyi ɓa zhin shiri ɓa bye a mwayi.
7Malaika kmisunyi wa bye owo mwayi aze agma-kuta ya n enayi, n gmi aje n amiyi fi n anyi. Anyi ajegna ngun ata. Kwa gwo ena shinwan ajegna ngun ata ena gyi ɓa n na agbe-gbe putuyi vinya.
8– 9Malaika bayi wa bye wo mwayi, a she nyaho ya dna n ela ngye epe yakwo nagyiyi, kwa wun aya nuwan ajegna ngun ata ya, ela ajegna ngun ata kwa wu ngye ami, awyesala ajegna ngun ata ɓafi.
10Malaika tayi wa bye mwayi Kpasu yakwo nagyi yi kwa kaya n eshe tu anuwan n adnayi ajegna ngun ata. 11Ayi kpasuyi ge, “Bedobedoyi,” ntuge kwo ɓei fi emwi a nuwan ajegna ngun ata, aza n mwa begye ɓafi.
12Malaika nyiyi wa bye owo mwai, n sai-sai yi, nyipyeyi ajegna ngun ata kwa dnawye-gma n epya yi n na akpasu ajegnayi ngun ata, n na abai nyipyei a dna wyegma sukwo kwa gna wyegma dna-dna. 13Shi mi ɓei shi awye magye zunkwo, nkwo gmanyi n na anyi bmana, kwoi sa ewyi n begye kalai ge, “owyi-owyi, owyi n na aza aba nɓa fi n na anyi nyin, ntu a na aɓo a nukwoyi ɓo n ɓa ɓelo esa fyewyi nyi, esa n na amalaika ngun ata-ka ɓa amwayi bye n ɓa cenyi.”
Copyright information for
GbrGAW